COMUNICAT DE CONVERGÉNCIA DEMOCRATICA ARANESA-PNA

Des deth Comité Executiu de CDA –PNA volem manifestar qu’ath deuant dera imposicion deth Govèrn der  Estat Español, entram en ua setmana trascendenta entà Catalunya, España e Aran.

Era intencion de “suspéner” era autonomia Catalana non hè sonque agreujar era situacion.

Ara mès que jamès era negociacion e eth dialòg son er unic camin.

Tà toti aqueri qu’an dubtes sus era Lei d’Aran, rebrembar-les qu’era nòsta Lei emane deth Parlament de Catalunya e ei sonque aguest Parlament eth que l’a arreconeishuda, en an 90 e recentament en an 2015, en ton escotar e dar  a Aran era possibilitat d’arténher ues còtes importantíssimes d’autogovèrn.

Non i a mès enlà dera Lei d’Aran, aprovada en hereuèr de 2015, cap auta lei qu’arreconeishe era realitat aranesa.

Es efèctes dera propòsta deth Govèrn Centrau enes tèrmes  plantejadi e se s’apròven peth Senat, en Conselh Generau d’Aran suposarà patir “de facto” ua paràlisis en toti es ambits des competéncies enes qu’en aguesti moments s’està trebalhant, e sonque i aurà era actiuetat deth dia a dia.

Per tot çò des de Convergéncia Democratica Aranesa mostram eth nòste totau refús e condemna ara interpretacion dera democràcia en aguesti tèrmes totalitaris en tot dar nauament eth nòste supòrt as institucions catalanes.