Convèni entara melhora deth Centre d’Aucupacionau (ADDA) e dera Residéncia tara Gent Grana Sant Antòni

Era Obra Social ” La Caixa” aportarà 20.000 € destinadi a hèr melhores en Centre Aucupacionau ADDA e ena Residéncia tara Gent Grana Sant Antòni.

Aguesta aportacion ei eth resultat deth convèni signat entre era Obra Social “La Caixa” e eth Conselh Generau d’Aran e que permeterà era melhora dera codina e dera gessuda ar exterior dera terrassa deth Centre Aucupacionau (ADDA) atau coma eth canvi de persianes des aules, e per un aute costat tanben permeterà eth canvi des bancs exteriors dera Residéncia entara Gent Grana Sant Antòni.

Es representants d’ambdues institucions an manifestat qu’ei important mantier era collaboracion estreta entre ambdues entitats, dat que permet “melhorar e contribuïr ath progrès des persones e era societat, damb especiau incidéncia enes collectius mès vulnerables”.

Dempús de visitar es installacions deth Centre ADDA, es respresentants d’ambdues institucions s’an desplaçat enquiar airau de Conangles entà conéisher ua des accions realizades pendent 2016 ath laguens deth projècte “Recuperacion d’Airaus Naturaus ena Val d’Aran” que siguec finançat en àmbit deth convèni entre era Deputacion de Lhèida e era Obra Social “la Caixa “entara preservacion e difusion des valors naturaus e que supausèc era melhora de cinc airaus naturaus d’Aran.