Convergéncia Aranesa da totau libertat d’actuacion ara sua gent, ath dauant der 1 d’octobre

Es membres dera Executiua de CDA-PNA comuniquen mejançant un escrit, dar totau libertat d’actuacion ara sua gent ath dauant der 1 d’octobre, en exercici des sòns Drets e Libertats individuaus.

Planvolut amic/ planvoluda amiga,

CDA-PNA tostemp a estat, des des sòns origens, un partit plurau, transversau e moderat a on fòrça pensaments, ideologies e inquietuts convergissen.

Es tempsi actuaus e es canvis sociaus, politics e economics qu’auem patit es darrèri ans, an provocat un canvi de paradigma en toti nosati, ena forma de véir e pensar eth Mon.  Euròpa, España, Catalunya e Aran viuem ua situacion politica inestabla e, soent, impossibla de predíder, radicalizant postures e extremant es posicionaments des partits politics.

Des de  CDA volem expressar eth nòste supòrt ara Democràcia.  Eth nòste País non s’enten sense era Democràcia, sense aquerò mès basic e fonamentau der exercici des Drets des ciutadans e dera esséncia der èster d’un País, qu’en sistèma actuau se cristallize damb er hèt dera participacion democratica e dera pluralitat d’idees.

Fòrça se’n parle deth pròplèu dia 1 d’octobre, damb fòrça dubtes e inquietuts, son moltes es persones que mos pregunten qué passarà en aguesta data e qué passarà abantes e dempús.  Malerosament non podem dar responses, de hèt, arrés pòt trobar responses categoriques e garantistes ad aguestes preguntes e toti es partits politics mòstren divergéncies importantes, soen insauvables, que hèn a trantalhar era esséncia madeisha dera Democràcia.

CDA-PNA mòstre eth sòn supòrt damb era participacion democratica, mès tanben mòstre era sua sensibilitat pes diuèrses corrents de pensament que conviuen ath laguens dera societat e deth Partit e per tant propugnam era participacion e era libertat des persones per dessús de tot. 

En conseqüència, dam a toti es nòsti cargues elèctes, militants, simpatizants, seguidors e votants, libertat entà hèr çò que considèren oportun en exercici des sòns Drets e Libertats individuaus, fonament dera Democràcia.

Corauments.

Carlos Barrera Sánchez                                                         Luis Carlos Medina Modroño

President de CDA-PNA                                                       Secretari Generau de CDA-PNA

Vielha, 16 d’agost de 2017