Acòrd entre eth Departament de Trabalh, Ahèrs Sociaus e Familhes e eth Conselh Generau d’Aran entà deféner es drets des persones LGTBI

Era conselhèra de Salut e Benéster d’Aran, Anna Díaz, e era directora generau d’Igualtat dera Generalitat de Catalonha, Mireia Mata, an signat un acòrd entà prebotjar un nau Servici d’Atencion Integrau (SAI) entà deféner es drets des persones LGTBI. Eth desvolopament dera Lei 11/2014, entà garantir es drets de lesbianes, gais, bisexuals, transgèneres e intersexuaus e entà eradicar era omofòbia, era bifòbia e era transfòbia contèmple era creacion d’aguesti servicis, que faciliten atencion de qualitat e de proximitat a persones que patisquen, agen patit o siguen en risc de patir discriminacion o violéncia per orientacion sexuau, identitat de genre o expression de genre.

Eth SAI dera Val d’Aran a coma objectius principaus visualizar era realitat deth collectiu LGTBI e sostier e atencion ara diuersitat sexuau e de genre. Ath delà, impulsarà eth trabalh en hilat, elaborarà informes sus era situacion locau des persones LGTBI deth municipi, dessenharà estrategies de sensibilizacion, e establirà canaus d’atencion, supòrt e acompanhament a victimes de LGTBIfòbia.

Des deth Departament se prebotje un hilat de SAI que se coordine des de diferenti encastres: centrau, territoriau e locau. Actuauments ja se trapen en foncionament eth SAI Centrau de Barcelona, atengut per Airau LGTBI dera Direccion Generau d’Igualtat; es territoriaus plaçadi enes Servicis Territoriaus deth Departament en Girona, Barcelona, Lleida, Terres de l’Ebre e Tarragona, e es SAI municipaus (d’ambit locau o comarcau) dera Garrotxa, Reus, Osona/Vic, Torelló, Esplugues de Llobregat, Tarragona, Noguera, Alta Ribagorça, Alt Urgell, Pallars Sobirà, Pallars Jussà, Segarra, e Segrià.

Segons era directora generau d’Igualtat, Mireia Mata, “era majoria des 105 ajuntaments de mès de 20.000 abitants e des conselhs comarcaus dispausen d’un servici d’aguestes caracteristiques”.

Pera sua part, era conselhèra de Salut e Benéster d’Aran, Anna Díaz a manifestat “aguest servici facilitarà era atencion de qualitat e de proximitat a persones que patisquen, agen patit o siguen eth risc de patir discriminacion o violéncia per orientacion sexuau, identitat de genre o expression de genre”.

 

 

Info e Fotos: Conselh Generau d’Aran