Alidé Sans interprète “Viatge entà Ítaca” era prumèra cançon en aranés deth disc de ”La Marató”

Eth disc de La Marató de Tv3 e Catalonha Ràdio includirà enguan per prumèr còp ua cançon en aranés. Se tracte dera mitica cançon de Lluís Llach “Viatge a Ítaca” qu’a estat arrevirada pera cantautora aranesa Alidé Sans e eth còr occitan Lo Barrut, un còr de votzes joenes que da naua vida as polifonies e musicianes tradicionaus occitanes.

Eth disc de La Marató gesserà ara venta eth dia 2 de deseme e se poderà aquerir damb quinsevolh des diaris que se publiquen en Catalonha.

Eth càncer tornarà a protagonizar La Marató de Tv3 e Catalonha Ràdio, que se realizarà eth 16 de deseme. La Marató, qu’arribe ara 27au edicion, ei eth programa solidari e divulgatiu per excelléncia de Tv3 e Catalonha Ràdio que des dera prumèra edicion, celebrada en 1992, a requectat 170 milions d’èuros e a finançat 794 projèctes d’investigacion qu’an implicat a 7.300 investigadors entara investigacion de diuèrses malauties.

Serà eth tresau còp que La Marató se dedique ara luta contra eth càncer, qu’ei era prumèra causa de mòrt entre es òmes e era dusau entre es hemnes.

Alidé Sans neishuda ena Val d’Aran, ei ua des pòques musicianes que canten en aranés. Dempús de debutar damb eth disc “Eth paradís ei en tu”, enguan a publicat un dusau disc anomenat “Henerècla” damb Paulin Courtial, un trabalh de musiciana mestiza damb influéncies de hip-hop, reggae, bossanova e ritmes africani.

Escota era cançon en programa Eth Maitin d’Aran: http://www.ccma.cat/catradio/alacarta/eth-maitin-daran/eth-maitin-daran-141118/audio/1020325/

 

Info e fotografia: Conselh Generau d’Aran