Aprobacion definitiva dera regulacion des Bòrdes e Cabanes ena Comission Territoriau d’Urbanisme dera Val d’Aran

Era Comission Territoriau d’Urbanisme dera Val d’Aran, a aprovat definitiuaments era modificacion des Nòrmes Subsidiàries de Planejament relatives ara regulacion dera preservacion e recuperacion des bòrdes e cabanes en solèr non urbanizable, aplicables as municipis d’Arres, Bausen, Bossòst, Es Bòrdes, Canejan, Les, Vielha e Mijaran, Vilamòs, e Naut Aran, entà adaptar-les as determinacions deth vigent Plan Director Urbanistic dera Val d’Aran. Era nòrma regirà sus es bòrdes e cabanes anteriores a 1969 en cas de Naut Aran, e de 1982 en rèste deth territòri, e permeterà qu’es proprietaris poguen gaudir des emplec ludic-familhar d’aguestes bastisses, tot qu’en cap cas aguesta regulacion permet destinar es bòrdes e cabanes ar emplec coma abitatge.

Eth President de Convergéncia Aranesa e Sindic d’Aran, Carlos Barrera destaquèc qu’era regulacion compòrte era creacion d’ua Comission de Seguiment integrat peth Conselh Generau e es ajuntaments que velharà peth seguiment e era evolucion dera aplicacion dera nòrma. Aguesta comission s’amassarà un còp ar an.

Atau, a compdar d’ara, es ajuntaments poderàn autorizar es intervencions de mantenença o de conservacion entà emplec ludic o pagés, atau coma es accions de reconstruccion de rèstes d’edificacions existentes.

Trobaratz tota era informacion sus aguest ahèr en:  http://www.conselharan.org/aprobacion-definitiva-dera-regulacion-des-bordes-e-cabanes-ena-comission-territoriau-durbanisme-dera-val-daran/

Hònt e Fotografies : Conselh Generau d’Aran