Aprovada era mocion conjunta en favor dera proteccion e impuls dera lengua Aranesa

Era mocion presentada conjuntament pes tres grops representants en Conselh Generau d’Aran, CDA, UA-PSC e PRAG, siguec aprovada per unanimitat en Plen celebrat eth dia 28 de hereuèr.

Aguesta mocion contemple un conjunt de mesures entà protegir e impulsar era lengua Aranesa coma lengua pròpia d’Aran, coma son incrementar era aportacion economica dera Generalitat, talament coma establís era Lei de Règim Especiau d’Aran, entà dotar ath Conselh des mieis economics de besonh tà amiar a tèrme accions qu’incrementen er usatge sociau dera nòsta lengua.

Cau rebrembar qu’aguest usatge preferent der aranés siguet recorrut peth Conselh de Ministres Espanhòl en an 2011 a instància d’ua prepausa deth govèrn socialiste d’alavetz, encapcelat per Jose Luis Rodriguez Zapatero.

Ath delà era mocion tanben prevé era creacion d’ua comission der aranés designada peth Plen deth Conselh Generau.

Carlos Barrera, Síndic d’Aran, e President de CDA-PNA a manifestat qu’aguesta mocion se harà a arribar a toti es ajuntaments d’Aran, ath Govern dera Generalitat e ara Diputació de Lleida, en tot prepausar as ajuntaments que se hígen ad aguest plan d’impuls der aranés.

Barrera, tanben a explicat que s’a enviat un escrit personau ath ministre d’Educacion e Cultura, Iñigo Méndez de Vigo, entà demanar-li respète pera lengua aranesa atau coma que demane desencuses pes sues maleroses, desencertades e simplistes paraules sus er aranés en Senat.

Eth Vicesíndic Luis Carlos Medina a explicat era implementacion dera administracion electronica en Conselh Generau d’Aran, en tot auer-se aprovat iniciaument era ordenança que la regule.