Avaloracion des resultats dera temporada d’iuèrn ena Val d’Aran

Era conselhèra de Torisme, Comèrç e Consum deth Conselh Generau d’Aran, Anna Díaz Morelló, compareishec eth dimars, dia 10 d’abriu dauant des mieis de comunicacion entà avalorar es resultats dera temporada d’iuèrn ena Val d’Aran.

Era conselhèra comencèc explicant qu’er inici dera temporada siguec hloisha, pr’amor que pendent eth pònt dera Purissima encara non auie nheuat ena Val d’Aran, çò que retardèc er inici dera temporada d’esquí, mès afavoric en cambi es visites de propietaris de segones residéncies, hèt que hèc qu’es restaurants e comèrci trebalhessin e podessen hèr excursions pera montanha. Çò que tanh as abits de consum des visitants, Díaz constatèc qu’, “an cambiat fòrça, segontes hònts de restauradors e otelèrs, pr’amor que se produissen fòrça resèrves de darrèra ora en toti es establiments”.

Era conselhèra de Torisme hèc referéncia ar esfòrç qu’està hènt eth Conselh Generau d’Aran e Torisme Val d’Aran, potenciant era promocion dera Val d’Aran, via hilats sociaus e era web de Torisme Val d’Aran. Çò que tanh a visites ara web de Torisme Val d’Aran, eth prumèr trimesadèr der an, an visitat era web mès de 48.000 usatgèrs, era procedéncia des quaus ei un 70% espanhòus, 10% francesi e 8% anglesi. En Facebook eth public potenciau supere eth milion de persones, eth 52% des visitants són hèmnes e eth 46% òmes. Per edats, eth grop de 25 enquia 34 ans ei eth mès nombrós, seguit des de 35 enquia 44 e en tresau lòc es de 18 enquia 24 ans, era procedéncia des fans ei majoritàriament espanhòla. En aguest sentit, Anna Díaz, expliquèc tanben, es campanhes de ràdio amiades a tèrme pendent es mèsi de hereuèr e març en Catalunya Informacion, Gum FM, Cadena Cope Madrid e era sponsorizacion der estat des pistes de Baqueira Beret en programa “La Neu a la Cope”, diguec, “volíem transmetre eth missatge qu’en Baqueira Beret, òc que i auie nhèu, e ena rèsta d’estacions d’esquí deth país non auien”. Damb aguestes campanhes, auem cercat eth perfil de visitant que mos interesse que vengue ara Val d’Aran, higec.

En quant ara preséncia en Heires, Torisme Val d’Aran, a estat present enes hèires de Toulouse, Navarra, Amsterdam, Tel Aviv, Fitur en Madrid, Wolrd Travel Marquet en Londres, MITT en Moscòu e per prumèr viatge ena Hèira Alimentaria en Barcelona, a on s’aprofitèc entà dar a conéisher e potenciar es productes dera Marca de Garantia dera Val d’Aran, atau coma eth nivèu dera gastronomia des restaurants dera Val d’Aran. Era avaloracion dera conselhèra siguec fòrça positiu, coma entà anonciar era intencion d’incrementar era preséncia dera Val d’Aran ena edicion dera Hèira Alimentaria d’ací dus ans.

En aguest punt era Conselhèra Anna Díaz, soslinhèc eth nivèu de collaboracion existent entre eth Conselh Generau d’Aran e era Agéncia Catalana de Torisme e era direccion generau de Torisme dera Generalitat de Catalunya, pr’amor qu’en un moment coma er actuau en què patim retalhades, “auem d’anar directament a arténher çò que volem e priorizar es accions, en aguest sentit auem pogut aprofitar tota era estructura dera Agéncia Catalana de Turisme, entà abaratir còsti e daurir naui mercats”. En aguest sentit, Díaz, auancèc que s’establirà eth madeish nivèu de collaboracion damb Torisme des tèrres de Lleida, laguens dera campanha de “Turisme Actiu”, entà potenciar totes es activitats de primauèra –ostiu, coma pòden éster, eth cicloturisme, senderisme, BTT, bicicleta de montanha, e qu’açò a de servir entà méter en valor çò que pòt aufrir era Val d’Aran.

Anna Díaz, tanben remerquèc es bones sensacions dempús dera visita des maxims responsables deth Tour Operador Neilson- Thomas Cook aguest iuèrn ena Val d’Aran, que daurís bones perspectives de cara ara temporada que veng çò que tanh ara arribada de toristes anglesi er iuèrn que veng. Tanben s’a contactat damb TTOO russi entà portar clients ara Val d’Aran.

Finauments era conselhèra de Torisme Anna Díaz, comentèc qu’ena Val d’Aran, auem visitants fòrça fidèus, des quaus eth 48% són catalans, seguits de madrilenhs, basqui e valencians.