Er IEA- Acadèmia Aranesa dera Lengua Occitana denoncie en Euròpa er abandonament dera lengua occitana per part deth Govèrn d’Espanha

Era delegacion der Institut d’Estudis Aranesi- Acadèmia Aranesa dera Lengua Occitana, formada peth President dera Acadèmia  Jusèp Loís Sans, eth  President dera Seccion Aranesa Jèp de Montoya e Rosa Maria Salgueiro, Secretària dera Acadèmia an denonciat en Parlament Europèu er abandonament e era ignorància der estat espanhòu damb era lengua occitana.

Es representants qu’ac compareishut ath dauant der Intergrop de Minories Tradicionaus, Comunitats Nacionaus e Lengües deth Parlament Europèu, an remercat qu’era “Lengua Occitana non ei cuedada ne tenguda en compde per part der estat espanhòu” , entot méter ara Generalitat coma un exemple mondiau de proteccion d’ua “lengua territoriau pròpria tot e qu’age pògui usatgèrs”

Pendent era sua intervencion, es participants an rebrembat qu’era lengua occitana siguec declarada oficiau damb er estatut der an 2006 en tot remercar “er enorme respècte pera identitat aranesa en Catalonha, a on aguesta lengua ei parlada per ua part deth territòri damb 10.000 abitants, en tot èster er unic territòri en eth qu’era lengua occitana receb un tracte tan important”.

Tanben an lamentat qu’era senténcia deth Tribunal Constitucional espanhòl sus er aranés les genere preocupacion perqué “sense preferéncia lingüistica, er occitan non poderà ocupar un espaci important e destacat ena administracion, er ensenhament es mieis de comunicacion  e en d’auti ambits sociaus fonamentaus que li permeten contunhar viua”,  “Era negacion dera sua preferéncia ei eth principi argumentau dera eliminacion”, an manifestat.

Er estat espanhòu ei objècte d’incompliment dera proteccion ara qu’obliguen es leis e es compromisi aqueridi peth govèrn espanhòu.  Era lengua occitana, lengua cooficiau, non recep eth madeish tracte per part deth govèrn d’Espanha que d’autes lengües cooficiaus”, an indicat es representants dera Acadèmia.

Foto: IEA