Era Deputacion de Lleida e eth Conselh Generau d’Aran signen eth convèni annau entara assisténcia as municipis e ara contractacion d’interventors

Eth sindic d’Aran, Carlos Barrera e eth president dera Deputacion de Lleida, Joan Reñé, an signat eth convèni de collaboracion ena matèria de Cooperacion e Assisténcia Municipau. Era signatura d’aguest convèni supause ua aportacion totau dera Deputacion de Lleida ath Conselh Generau d’Aran de 175.472 èuros.

Mejançant aguest convèni, era Deputacion de Lleida collabora economicaments damb eth Conselh Generau d’Aran en dues linhes. Ua d’eres adreçada ara prestacion de servicis de cooperacion e d’assisténcia as municipis d’Aran. Era aportacion d’aguesta prumèra linha ascendís a 140.287 èuros.

Era auta linha contemple era collaboracion economica entara contractacion de secretaris-interventors deth Servici d’Assisténcia Tecnica (SAT). En aguest cas, era subvencion totau ei de 35.185 èuros, que correspon a ua plaça de secretari-interventor contractat ath Conselh Generau d’Aran.

Eth president dera Deputacion de Lleida, Joan Reñé, e eth sindic d’Aran, Carlos Barrera, an explicat que damb aguesta linha se sostén as petiti municipis que non pòden contractar un secretari de forma permanenta en consistòri. Atau, se finance era contractacion des secretaris-interventors que dan servici a diferenti municipis entà garantir que toti es tramits administratius e juridics s’amien a tèrme corrèctaments.

Es servicis de cooperacion e d’assisténcia as municipis includissen er assessorament, era elaboracion d’informes e era redaccion de documents relatius ath foncionament e era activitat des municipis en matèria juridico-administrativa e economico-financera. Tanben er assessorament en matèria de planejament, gestion e disciplina urbanistica, atau coma era emission d’informes sus expedients tramitadi entara concession de licéncies urbanistiques e activitats sometudes ath regim d’autorizacion ambientau e era elaboracion d’estudis, informes e projèctes tecnics relatius a òbres e servicis locaus.

“Aguesta linha de collaboracion entre administracions permet qu’era Administracion locau sigue mès eficienta” a hijut Barrera, qu’a soslinhat “eth trabalh inqüestionable qu’amien a tèrme es administracions locaus en territòri”.