Es ossi, es aigües deth Valarties, era assisténcia primària, es òbres de remodelacion der Espitau e era residéncia Sant Joan de Les, principaus punts deth Plen deth Conselh Generau

Eth Plen deth Conselh Generau d’Aran aprovèc ena sua darrèra session era rectificacion e modificacions tecniques en document deth protocòu en relacion ath programa de reintroduccion der os e er sua afectacion en territòri aranés. Er objectiu d’aguest document ei que servisque coma huelha de rota entà actuar ath dauant de situacions provocades per quinsevolh des exemplars d’ós que i a en Pirenèu. Cau rebrembar qu’es ossi actuaus provien dera reintroduccion der an 1995 ena  que tanben i participèren es Govèrns espanhòu e francés e es comunautats autonòmes d’Arangon e Navarra.

Un aute punt importantant a estat tanben era afectacion der esbaussament que i auec ena ribèra de Valarties en mes de mai en tot hèr a baishar es aigües dera Garona plies de hanga e residus. Barrera manifestèc qu’eth Conselh dejà contactèc damb era CHE qu’amiarà a tèrme ua accion d’urgéncia  en tot bastir ua escolhèra entà restancar eth materiau der esbauçament e canalizar era aigua entà garantir era sua incorporación en arriu Valarties en perfècte estat de puresa.

En çò que hè ar ahèr deth cambi de modèu dera atencion primària qu’afècte as pòbles deth Baish Aran,  eth Sindic expliquèc qu’ei prevista era organizacion d’amassades damb es ajuntaments qu’atau ac solliciten entà explicar era evolucion deth modèu d’atencion cap a ua atencion mès personalizada enes domicilis e atau esvitar qu’es persones s’agen de desplaçar tath CAP.

Tanben informèc sus era ampliacion der airau quirurgic der Espitau Val d’Aran, en tot explicar qu’aguesti trabalhs s’alongaràm enquiath tresau trimèstre deth 2019 degut ath besonh de coordinar es òbres damb era atencion diària as usatgèrs.

En referéncia ath punt dera Residéncia entara Gent Grana Sant Joan de Les e ath nau modèu de Pompièrs e Emergéncies d’Aran, eth Síndic expliquèc qu’es òbres dera residencia dejà son començades e que se manten er acòrd damb era Generalitat entà qu’era residencia Sant Joan de Les sigue consorciada ath 50% damb era Generalitat.

E en relacion ath nau modèu d’emergéncies, manifestèc que se nomentarà un coordinador der operatiu des estructures entre Bombers dera Generalitat e Pompìers d’Aran.

Foto: Conselh Generau d’Aran