Eth Conselh Generau d’Aran confie ena empresa MicGrup Sports coma assessora entara promocion der espòrt de prumèr nivèu e eth torisme esportiu

Eth vicesindic Luis Carlos Medina e es empresaris Xavi Julià e Jordi Miró signen eth convèni.

Eth Conselh Generau d’Aran a confiat ena empresa gironina MicGrup Sports entà aconselhar-la pendent un an, prorrogable enes futurs exercicis, entara promocion der espòrt de naut rendiment de prumèr nivèu -damb eth fótbol coma prioritat- e eth torisme esportiu.

Eth convèni signat aué en Vielha preten impulsar e fomentar era practica der espòrt ena Val d’Aran e era utilizacion des installacions plaçades en tot eth territòri.

MicGrup Sports, representada pes sòcis Xavi Julià e Jordi Miró, a aportat dejà ath Conselh ua exaustiva auditoria des camps de fótbol qu’existissen actuauments ena Val d’Aran e es sòns possibles usatges. Atau madeish, era empresa gironina a presentat ath Conselh un auantprojècte d’arquitectura en 3D hèt peth prestigiós estudi L35 de Barcelona coma punt de partida entà méter era marcha, en futur, un centre de naut rendiment fotbolistic e esportiu internacionau plaçat en còr dera Val d’Aran.

Era collaboracion e assessorament per part de MicGrup impulsarà era organizacion de campus, clinics, estades de clubs esportius e eveniments esportius diuèrsi.