Eth Departament d’Agricultura dera Generalitat de Catalunya realizarà eth mapa de solèrs agraris de la Val d’Aran

S’a celebrat ua reünion en Barcelona entre era direccion generau d’Agricultura e Ramaderia e eth sindic d’Aran

Eth Departament d’Agricultura, Ramaderia, Pesca, Alimentacion e Medi Naturau (DAAM) realizarà eth mapa de solèrs agraris dera Val d’Aran, segontes er acòrd qu’an arribat, en Barcelona, era direccion generau d’Agricultura e Ramaderia e eth sindic d’Aran, Carlos Barrera. Aguest mapa s’amiarà a tèrme pendent aguest an 2013, amassa damb eth Conselh Generau d’Aran. Aguesta accion ei un contunhament deth Mapa de Solèrs de Catalunya qu’execute eth DAAM damb er Institut Geologic de Catalunya

Aguest mapa de solèrs dera Val d’Aran a escala 1:25.000 a de perméter identificar es solèrs agraris, e concrètaments era situacion, era estenduda, es caracteristiques, es usatges e es potenciaus. Entara realizacion d’aguest mapa, calerà era prenuda de mòstres e era sua analisi de laboratòri. Es tecnicians deth Conselh Generau d’Aran collaboraràn damb es tecnicians deth Departament d’Agricultura en aguesti trabalhs de camp.

A compdar de tota aguesta informacion, s’elaborarà eth corresponent mapa de solèrs e s’establirà era sua aptitud entàs principaus usatges agraris.

Aguesta iniciatiua represente ua clara apòsta deth DAAM e deth Conselh Generau d’Aran, entà qu’era agricultura vengue de nau ua activitat importanta en aguesta zòna, en tot potenciar mès que mès es productes de qualitat e proximitat.

Entre es accions futures s’an d’includir tanben es recomanacions sus fertilitat, era recuperacion de practiques agricòles e er assessorament.