Eth Festivau Europèu d’Arts Digitaus dera Val d’Aran, Dig@ran presentat en ajuntament de Vielha.

Agèr dimars, 10 d’abriu, auec lòc ena Sala de Plens der ajuntament de Vielha e Mijaran, era presentacion oficiau dera prumèra edicion deth Festivau Europèu d’Arts Digitaus dera Val d’Aran, Dig@ran, qu’aurà lòc ena Val d’Aran des deth diuendres 29 de junh d’enguan enquiath dimenge dia 8 de junhsèga.
Ena presentacion ara qu’assistic entre d’auti eth sindic d’Aran, Carlos Barrera e er alcalde de Vielha e Mijaran, Àlex Moga; Eric Rella, president dera Associacion Aranesa d’Arts Numeriques, destaquèc qu’en aguesta prumèra edicion Dig@ran, aufrirà tot un ventalh d’expressions digitaus que van des dera musica e es arts plastiques enquiara dansa, eth vidèo e era interactivitat. Pendent es dies que dure eth festivau se poderà veir, gaudir e participar de montatges coma Aran Bell’s, Le Ponton Sonore e Fet a mà, creadi expressament entath festivau Dig@ran e qu’encara non s’an vist en cap auta ciutat europèa.
Entath sindic d’Aran, Carlos Barrera, Dig@ran “assegure era promocion dera cultura aranesa, pr’amor qu’es òbres innovadores que i seràn presentades s’inspiren en er esperit des grani valors dera Val d’Aran e junhen subtilament, es nòstes tradicions damb era modernitat”
Er objectiu de Dig@ran, en paraules der alcalde de Vielha, Àlex Moga ei “associar es expressions e identitats araneses damb es arts digitaus e es naues tecnologies, damb un nau modèu qu’associe era cultura e era economia e qu’aglutine toti es aspèctes d’ua politica de desvolopament sostenible”.
Pendent 10 dies, es installacions e performances, deth Festivau d’Arts Digitaus dera Val d’Aran, Dig@ran, aucuparán eth territòri aranés, damb òbres interactives que permeterán era trobada entre eth public e es artistes.
Traparatz tota era informacion sus eth festivau en: http:// www.digaran.org