Eth Jutjat de Vielha introdusís er aranés enes sues senténcies

Damb era arribada dera naua jutgessa substituta, Sra. Natalia Plaza en jutjat de Vielha, er aranés a començat a formar part dera vida judiciau deth nòste País.

Per iniciatiua dera Sra. Plaza e dempús de contactar damb Carlos Barrera, Sindic d’Aran des de hè lèu un an es senténcies tanben se reviren ar aranés. Enquiath moment son un totau de 90 es documents reviradi ara nòsta lengua, era majoria de jurisdiccion civila, atau coma quauqua senténcia penau.

Carlos Barrera afirmèc qu’ei fòrça de besonh compdar damb era iniciatiua privada, coma ei aguest cas, entà qu’er aranés pogue èster present cada còp mès en toti es ambits sociaus.

Aguest non ei eth prumèr còp que surgís aguesta iniciatiua, ja que pendent es ans 90 er alavetz Notari de Vielha, Sr. Vicent Simó, tradusic ath torn deth 18% des escritures pendent eth periode que siguec en Aran.

Entà amiar tà deuant aguesta iniciatiua eth Govèrn d’Aran metec a disposicion dera jutgessa es servicis d’ua traductora deth Conselh  qu’a estat era que se n’a encuedat de hèr aguesti trabalhs.

Barrera tanben manifestèc era intencion de sollicitar ara Coselleria de Presidéncia e ara de Justicia eth possible refòrç deth servici de lingüística deth Conselh, entà poder atíer es demanes que poguen sorgir.