Publicacion dera Lei d’Aran trilingüe entà toti es vesins e vesies d’Aran.

Aguesta ei era Presentacion dera publicacion deth document complèrt d’aguesta Lei, hèta peth Conselh Generau d’Aran enes tres lengües (aranés, catalan e castelhan) entà toti es vesins e vesies d’Aran.

Se pòt arténher en Conselh Generau d’Aran o ben enes Ajuntaments aranesi.

 

Planvolut vesin,

Coma ben sabetz eth dia 5 de hereuèr de 2015, entrèc en vigor era naua Lei de Regim Especiau d’Aran. Es trebalhs d’elaboracion e prepausa d’aguesta naua lei sigueren fruit deth consens de toti es grops politics aranesi.

En data 7 d’agost de 2012, eth Plen deth Copnselh Generau d’Aran, compausat pes grops politics CDA, UA-PSC e PRAG, aprovèren per unanimitat eth tèxt dera prepausa e li dèren eth corresponent tramit parlamentari.

Siguec eth 19 de junh de 2013 quan aguesta prepausa se tramitèc en Parlament de Catalunya coma ponéncia conjunta de toti es grops politics parlamentaris e siguec aprovada en session plenària eth 21 de gèr de 2015.

Eth sentit deth vot siguec çò que seguís:

– 121 vots a favor (CiU, ERC, PSC, PP, Ic Verds- EuiA e eth Grop Mixt)
– 9 abstencions (Ciutadans)
– 5 parlamentaris non siguèren presents ena session

Presentèc es trebalhs d’aguesta Lei eth Deputat e Ponent-relator Sr. Alex Moga.

Posteriorment, eth 14 de hereuèr deth 2015, eth Plan Auble. President dera Generalitat de Catalunya Sr. Artur Mas i Gavarró la sancionèc solemnament en Santuari de Mijaran.

Merite un especiau reconeishement eth hèt qu’era prepausa lei siguec artenhuda per unanimitat de toti es grops politics aranesi e eth consens majoritari des vesins que tanben participèren des de disparièrs ambits professionaus, associatius, sociaus e particulars.

Per tot çò que represente entà Aran era nòsta Lei, vos hèm arribar aguest exemplar damb era confidança qu’aprohondir en sòn contiengut vos a de perméter arténher ua vision fòrça mès real des possibilitats de desvolopament politic, sociau e economic d’Aran.

En nòm des grops politics que compausam eth Plen deth Conselh Generau d’Aran, recebetz ua corau salutacion.

 

 

Carlos Barrera Sánchez
Sindic d’Aran