REVÈS ARA MAJORIA ABSOLUTA  EN PLEN DER AJUNTAMENT DE VIELHA E MIJARAN

Er Alcalde de Vielha e Mijaran (PSC-UA) a perdut era majoria absoluta e non a prosperat era prepausa de regulacion d’apartaments d’ús toristic en municipi.

En plen der ajuntament celebrat aué dimèrcles en session extraordinària un des punts ère eth dera aprobacion dera ordenança reguladora d’apartaments d’ús toristic en municipi.

Contra tota prevision er alcalde de Vielha e Mijaran non a obtengut era majoria absoluta qu’auie de besonh entà aprovar -la. Aguesta regulacion discriminaue entre clases sociaus, poder adquisitiu e limitaue er ús dera viuenda privada ara major part dera poblacion deth municipi.

Aguesta regulacion a demorat suspenuda pendent un an entà cercar era melhor solucion, mès en aguest temps en cap moment er Alcalde Serrano a sajat de parlar damb es còssos de Convergéncia Aranesa sus aguest ahèr, ja que confiaue ena sua majoria absoluta, qu’aué l’a perduda per qu’un còsso deth pròpi equip de govèrn s’a abstengut en tot hèr ua fòrta critica ara prepausa de regulacion d’apartaments d’ús toristic en municipi, en tot èster eth resultat dera votacion: 6 vòts a favor de part der equip de govèrn d’UA-PSC, 4 en contra de Convergéncia Aranesa, e 2 abstencions dera còsso de Ciutadans e der aute còsso d’UA-PSC.

Per tant a compdar deth dia 15 de seteme se poderà tornar dar licéncies d’apartaments toristics en Vielha e Mijaran.

Ei clar qu’es còssos de  Convergéncia Aranesa èm totalment d’acòrd e consideram qu’ei totalment imprescindible que i age ua regulacion , mès ua regulacion sorgida dera participacion de toti es grops politics que conformen eth Plen, e non a estat atau per qu’enquia sonque hèr ua semana er Alcalde non a parlat damb arrés e çò que pretenie ère imposar eth sòn critèri.

Demorem qu’a compdar d’ara, parle damb nosati entà poder hèr ua regulacion justa, innovadora, que s’adapte as normatives e as leis vigentes e qu’era ciutadania veigue un ajuntament que se preocupe des interèsi de toti es ciutadans e non sonque d’ua part. Li auem ofèrt era nòsta ajuda, sense prèsses, entà garantir ua solucion adequada as naues realitats economiques, toristiques e sociaus de toti es vesins e vesies deth municipi e  non sonque d’uns pògui.

Des de Convergéncia Aranesa reclamam justicia sociau, oportunitats entà toti, sense exclosions e un marc regulador en benefici der interés generau e que non sigue discriminatòri coma ère era prepausa qu’aué a perdut.