Session plenària deth Conselh Generau d’Aran

Eth Plen deth Conselh Generau d’Aran ena session celebrada eth diuendres dia 4 de mai, ua modificacion de credit de 500.000 € que permeterà entre d’auti urbanizar era plaça posteriora dera sedença deth pròpri Conselh Generau d’Aran. Aguesta urbanizacion s’amiarà a tèrme mejançant un acòrd damb er Ajuntament de Vielha e Mijaran. Eth Govèrn d’Aran destinarà 163.000 € en aguesta urbanizacion.

Per aute costat, ua auta part d’aguesta modificacion de credit se destinarà ath bastiment d’ua galaria de tir. Eth sindic d’Aran, Carlos Barrera, a explicat qu’ena Val d’Aran i a mès de 700 licéncies d’armes. A compdar der an 2002 damb eth traspàs de competéncies dera gestion de caça e pesca, eth Conselh Generau d’Aran crube era taxa administratiua des licéncies de caça e pesca. Dempús de tres ans de tramits deuant era intervencion d’armes dera Guardia Civil s’a artenhut era licéncia entath bastiment d’aguest equipament. Aguesta installacion serà gerida pera Societat de Caça e Pesca dera Val d’Aran. Era galaria de tir se plaçarà ena zòna dera anciana incineradora.

Pendent era session plenària tanben s’a aprovat iniciauments era modificacion deth reglament des escuts des entitats locaus dera Val d’Aran. Era modificacion deth reglament se harà en tot aplicar era Lei 1/2015 de regim especiau d’Aran e compdarà damb er assessorament eraldic der IEA-Academia aranesa dera lengua occitana.

Fin finau eth Plen deth Conselh Generau d’Aran a aprovat era designacion des membres dera comission de seguiment der usatge der aranés ena Corporacion Catalana de Mejans Audiovisuaus, entà auançar en usatge sociau der aranesa a trauès des mejans dera Corporacion, e favorir sustot er usatge dera lengua entre es mès joeni.

Per part dera Corporacion Catalana de Mejans Audiovisuaus era comission serà integrada pera vicepresidéncia deth conselh de govèrn dera Corporacion, es caps d’informatiu de Catalonha Ràdio e Tv3, e per un representant de Recorsi Umans. Per part deth Conselh Generau er integrant seràn eth sindic d’Aran, Carlos Barrera, era conselhèra de Torisme e Desvolopament Economic, Anna Díaz, un representant d’UA-PSC, e Rosa María Salgueiro, presidenta dera Fondacion Musèu Etnologic dera Val d’Aran.

Hònt: Conselh Generau d’Aran