Visita de trebalh dera Diputacion de LLeida en Aran

Eth sindic d’Aran Carlos Barrera recebec aguesta setmana en Conselh Generau d’Aran, as responsables des Servicis Tecnics dera Deputacion de Lleida, eth deputat Antoni Villas e eth coordinador de SSTT, Ramon Lleonart, qu’acompanhadi peth vicepresident 3au dera Deputacion de Lleida, Pau Perdices, visitèren diuèrsi pòbles dera Val d’Aran.

Era visita, segontes expliquèc eth sindic d’Aran, Carlos Barrera, respón ath seguiment que se hè des deth Conselh Generau d’Aran e era pròpia Deputacion de Lleida dera visita que realizèc eth president Joan Reñé eth passat mes de deseme de 2011 entara Val d’Aran, pera inauguracion deth nau pònt d’Aubèrt, e que tanben aprofitèc, entà vèir “in situ” er estat dera carretèra de Vilamòs.

D’aquera visita, en gessèren bères prepauses per part deth sindic d’Aran e pes alcaldes dera Val d’Aran, entà éster estudiades per part dera Deputacion. Ua des demanes deth sindic, ei qu’era Deputacion de Lleida realize er estudi deth projècte de reforma dera carretèra d’accès de Vilamòs a Arres, atau coma eth desbrossament e era mielhora des marges dera carretèra.

Autant eth vicepresident dera Deputacion, Pau Perdices coma eth deputat Antoni Villas, coincidiren qu’era Deputacion harà er estudi d’aguest projècte, que si tirés entà dauant se poderie començar a realizar er an 2013.

Es responsables dera Deputacion, aprofitèren entà visitar a mès de Vilamòs, es pòbles de Vilac, Es Bòrdes e Bausen, a on es respectius alcaldes plantejèren diferentes demanes de mielhora enes carretères e accèssi des sues poblacions.

Pera sua part, er alcalde de Vielha e Mijaran, Àlex Moga, expliquèc qu’un des projèctes que tanben assumirà era Deputacion de Lleida, dempús dera visita deth president Joan René de finaus der an passat, ei era reforma dera Sala Social d’Aubèrt, qu’era institucion amiarà a tèrme a compdar d’aguest an 2012, un viatge s’age redactat eth projècte, e çò que tanh a Vielha e Mijaran, era Deputacion de Lleida, aportarà 250.000€ entara limpiesa e manteniment des entorns des arrius Garona e Nère.